零食是大家都吃過的食物，而每個年代都有屬於那代人的經典零食。90後的你還記得那些玩得又食得的零食嗎？以下10個經典懷舊零食，絕對會令你的兒時回憶一秒湧現！
女孩子們都愛把戒指糖套在手上。(香港零食大王圖片)1. 戒指糖戒指糖的賣點就係可以套住隻手指，等班豆釘可以幻想自己真係擁有一隻戒指。天真無邪的大家以為套住隻手指就唔會移位？少年，當年的我們太年輕了。隻戒指鬆到一個點！基本上只要揚一揚手，粒糖就會黏到其他手指。然後隻手就會「黐笠笠」，感覺很噁心！
眼鏡朱古力加兩條橡筋便可玩上半天，快樂就是如此簡單。（黃寶瑩攝）2. 眼鏡朱古力見到8字型眼鏡朱古力就會加兩條橡筋將它整成眼罩。筆者還是細路時，經常幻想著自己是拯救世界的朱古力超人。大人常常教導小朋友不可搞破壞，諷刺的是，要吃到朱古力必先要把其包裝破壞。將朱古力逐粒逐粒啪出來，這個搞破壞的過程，一個字：爽！
為了抽中超人印水紙，當年的你花了多少錢？（美樂士多Facebook專頁圖片）3. 印水紙香口膠呢款香口膠大大粒望落好似好抵食，食落就知好鬼嚡又死甜，不過嚼多幾吓已經無味，仲要好快失去彈性，食到最後個質感就好似食緊泥膠。講到咁難食點解仲會成為兒時最愛？因為香口膠並不是重點，印水紙才是最終目標！一日唔打開個包裝一日都唔知會抽中怪獸定超人，為了令人買多幾粒，所以抽中怪獸的機率接近99％。如果咁好彩抽到鹹蛋超人一定光速印上手係其他小朋友前威返次。
入口即溶的太空糖，又名粉糖。（WeShare網頁圖片）4. 太空糖太空糖，同太空一丁點關係都無。反而包裝袋上有兩隻唔關事的松鼠。外表硬掘掘，奇就奇在啲粉入口即溶。由硬到軟的過程只需數秒。粉糖在口腔內崩壞的過程感覺十分有趣，那種快感是會令人上癮的，不自覺地一粒又一粒放入口。
唧唧冰其實是雪凍了的果汁棒，因要用手將冰「唧」上嘴裡而命名。(Openrice 網頁圖片)5.唧唧冰唧唧冰五顏六色，味道各有不同，不過十居其九都是伏味。一支只售一蚊，同朋友一人一半最抵食。雖然有個剪口位，不過大家都會在中間啪開，如果力水不足可用膝頭借力，重點是整套動作要瀟灑利落才能獲得旁人歡呼。唧唧冰抵食在可以一物二食，鐘意食冰的話直接大口大口咬或是等到冰塊半融時把果汁啜入口。
6. 奇趣杯奇趣杯最令人記得的不是份量少得可憐的雪糕，而是在底層附送的卡通人物玩具。有得食又有得玩，一次過滿足兩個願望。當年Sanrio跟雀巢合作，旗下卡通人物陸續登錄奇趣杯，有Hello Kitty、XO、馬騮仔、大口仔等。雖然雪糕幾啖就食完，個公仔又唔知點樣拎出來，次次都要憑感覺去開。不過為了儲齊一套，都是會買完又買，重複的公仔就與朋友交換。
可樂味和提子味，你鐘意邊隻味？(LIKETIMES網頁圖片)7. 樽裝可樂糖包裝跟足可口可樂的設計，仿真度極高。一拉開蓋就好似打開潘多拉的盒子，選擇只有食同食哂，因為個蓋係合唔返入去的Sorry。有可樂味同提子味，不過提子味較甜，始終都是可樂味較受歡迎。識食一定係倒入口咁食，咁先似飲緊可樂嘛。
極度吵耳但又忍不了手的嗶嗶糖。(BigGo網頁圖片)8. 嗶嗶糖嗶嗶糖的中間有一個小洞，可以發出哨子般的聲音。少不更事的時候，經常靜雞雞喺人哋耳邊失驚無神地用力吹。嚇到人成個彈起，是每個人童年必定出現畫面。
鳳仙雪條最外層是香蕉味的朱古力脆皮，夾層是呍呢拿味軟雪糕，最內層是芒果冰。(香港高登討論區圖片)9. 鳳仙雪條鳳仙，多麼有仙氣的名字。一聽已令人心曠神怡，加上印有椰樹的包裝袋，令人感覺置身在陽光與海灘之中。一口咬破香蕉味的朱古力脆皮，呍呢拿味雪糕瞬間包圍味蕾、緊接而來的就是酸酸甜甜的芒果冰。一個價錢，三款口感，三種滋味，教人如何抗拒鳳仙!(絕非廣告打手，純粹歌頌，只怪筆者太愛食鳳仙。)
煙仔朱古力是當年「扮大人」必備的零食。(痞客邦PIXNET 圖片)10. 煙仔朱古力以前士多沒有冷氣，很多時買回來的煙仔朱古力都呈半融狀態，無論你有幾小心翼翼撕開那層白色包裝紙，永遠都會有一點點黐住朱古力。朱古力的難食程度與金幣朱古力一樣，細個會買來食的原因只有一個：扮大人！把「煙」放在口中叼住的樣子，你唔好同我講你無試過呀。